കൊച്ചി: പ്രാര്‍ത്ഥനാ ഗീതികള്‍ മനസ്സിനെ നിര്‍മലമാക്കിയ വിശുദ്ധ സായാഹ്നത്തില്‍ വരാപ്പുഴ അതിരൂപതയുടെ പുതിയ മെത്രാപ്പോലീത്തയായി ഫ്രാന്‍സിസ് കല്ലറയ്ക്കല്‍ അഭിഷിക്തനായി. സെന്റ് ആല്‍ബര്‍ട്‌സ് സ്‌കൂള്‍ മൈതാനിയില്‍ പ്രത്യേകം സജ്ജമാക്കിയ വേദിയില്‍, ഉയര്‍ക്കപ്പെട്ട ക്രിസ്തുനാഥന്റെ കമനീയ രൂപത്തിനു കീഴിലായി നടന്ന അഭിഷേക കര്‍മങ്ങള്‍ക്ക് കര്‍ദിനാള്‍ ഡോ. ടെലസ്‌ഫോര്‍ ടോപ്പോ മുഖ്യ കാര്‍മികത്വം വഹിച്ചു. മെത്രാപ്പോലീത്തമാരും ബിഷപ്പുമാരും വൈദിക ശ്രേഷ്ഠരും സന്ന്യാസവര്യന്മാരുമടക്കം ആയിരക്കണക്കിന് വിശ്വാസികള്‍ സംബന്ധിച്ചു.

കര്‍ദിനാള്‍ ഡോ. ടെലസ്‌ഫോര്‍ ടോപ്പോയ്‌ക്കൊപ്പം ആല്‍ബര്‍ട്‌സ് മൈതാനിയിലെത്തിയ നിയുക്ത മെത്രാപ്പോലീത്തയെ 105 അംഗ ഗായകസംഘം ആശംസാഗീതത്തോടെ വരവേറ്റു. പൂക്കൂടകളുമായി നൂറുകണക്കിന് കുട്ടികള്‍ അണിനിരന്ന പ്രദക്ഷിണവഴിയിലൂടെ വേദിയിലേക്കെത്തിയ ഡോ. ഫ്രാന്‍സിസ് കല്ലറയ്ക്കലിനെ മുന്നൂറോളം വൈദികരും മെത്രാന്മാരും മെത്രാപ്പോലീത്തമാരും അനുഗമിച്ചു.

ഫ്രാന്‍സിസ് കല്ലറയ്ക്കലിനെ മെത്രാപ്പോലീത്തയായി നിയമിച്ചുകൊണ്ടുള്ള ബനഡിക്ട് പതിനാറാമന്‍ മാര്‍പാപ്പയുടെ ഉത്തരവ് കര്‍ദിനാള്‍ ടോപ്പോയുടെ നിര്‍ദേശപ്രകാരം ചാന്‍സലര്‍ ഫാ. വര്‍ഗീസ് വലിയപറമ്പില്‍ വായിച്ചു. കൈയടിച്ചും ദൈവജനത്തിന് സ്തുതിയെന്ന് പ്രഘോഷിച്ചും വിശ്വാസ സമൂഹം ഇതിനെ സ്വാഗതം ചെയ്തു.

തുടര്‍ന്ന് മുഖ്യ കാര്‍മികനായ കര്‍ദിനാള്‍ ടെലസ്‌ഫോര്‍ ടോപ്പോ ഡോ. ഫ്രാന്‍സിസ് കല്ലറയ്ക്കലിനെ നിയുക്ത മെത്രാപ്പോലീത്തയുടെ സിംഹാസനത്തിലേക്ക് ആനയിച്ച് ഉപവിഷ്ടനാക്കുകയും അജപാലനാധികാരത്തിന്റെ പ്രതീകമായ അംശവടി കൈമാറുകയും ചെയ്തു.

അതിരൂപതയിലെ വൈദികര്‍ മെത്രാപ്പോലീത്തയുടെ സമക്ഷമെത്തി കൈമുത്തി ആദരവും അനുസരണവും പ്രഖ്യാപിച്ചു. തുടര്‍ന്ന് സന്ന്യസ്തരുടെയും വിശ്വാസികളുടെയും പ്രതിനിധികളും പുതിയ മെത്രാപ്പോലീത്തയെ വന്ദിച്ച് ആദരവും അനുസരണവും പ്രഖ്യാപിച്ചു. തീര്‍ത്ഥജലം ആശീര്‍വദിച്ച് പുതിയ മെത്രാപ്പോലീത്ത ദൈവജനത്തിനുമേല്‍ തെളിച്ചു. തുടര്‍ന്ന് ആര്‍ച്ച് ബിഷപ്പ് കല്ലറയ്ക്കലിന്റെ മുഖ്യ കാര്‍മികത്വത്തില്‍ ദിവ്യബലി നടന്നു.

ആര്‍ച്ച് ബിഷപ്പ് ഡോ. സൂസൈപാക്യം വചനസന്ദേശം പങ്കുവെച്ചു. കാഴ്ചവെപ്പില്‍ വിശ്വാസികളുടെ പ്രതിനിധികള്‍ക്കൊപ്പം നവ മെത്രാപ്പോലീത്തയുടെ സഹോദരി സിസ്റ്റര്‍ റേച്ചലും സഹോദരന്‍ ആന്റണി കല്ലറയ്ക്കലും പങ്കുചേര്‍ന്നു.

ദിവ്യബലിയുടെ സമാപനത്തില്‍ ആര്‍ച്ച് ബിഷപ്പ് ഫ്രാന്‍സിസ് കല്ലറയ്ക്കല്‍ ജനമദ്ധ്യത്തിലേക്കിറങ്ങി വിശ്വാസികളെ ആശീര്‍വദിച്ചു.

ദിവ്യബലിയെ തുടര്‍ന്ന് നടന്ന അനുമോദന സമ്മേളനത്തില്‍ മേജര്‍ ആര്‍ച്ച് ബിഷപ്പ് ബസേലിയോസ് മാര്‍ ക്ലീമീസ് കാതോലിക്ക ബാവ, ബിഷപ്പ് സെബാസ്റ്റ്യന്‍ എടയന്ത്രത്ത് തുടങ്ങിയവര്‍ സംസാരിച്ചു. അതിരൂപത അഡ്മിനിസ്‌ട്രേറ്ററായി ചുമതല വഹിച്ചിരുന്ന ബിഷപ്പ് ഡോ. ജോസഫ് കാരിക്കശ്ശേരി ചടങ്ങുകള്‍ക്ക് മാര്‍ഗനിര്‍ദേശം നല്‍കി.

ആര്‍ച്ച് ബിഷപ്പ് ഡോ. ഡാനിയേല്‍ അച്ചാരുപറമ്പില്‍ കാലം ചെയ്തതിനെ തുടര്‍ന്ന് കോട്ടപ്പുറം ബിഷപ്പായിരുന്ന ഫ്രാന്‍സിസ് കല്ലറയ്ക്കലിനെ പുതിയ മെത്രാപ്പോലീത്തയായി മാര്‍പാപ്പ പ്രഖ്യാപിക്കുകയായിരുന്നു.

കോട്ടപ്പുറം കല്ലറയ്ക്കല്‍ ജോസഫിന്റെയും ബ്രിജീത്തയുടെയും ഏഴു മക്കളില്‍ ഇളയവനായി 1941 ഒക്ടോബര്‍ 10-നാണ് ഫ്രാന്‍സിസ് കല്ലറയ്ക്കല്‍ ജനിച്ചത്.

1956 മെയ് ഒന്‍പതിന് മൈനര്‍ സെമിനാരിയില്‍ അംഗമായി. 1968 ജൂണ്‍ 29 ന് പൗരോഹിത്യം സ്വീകരിച്ചു. 1987 ആഗസ്ത് ഒന്നിനാണ് കോട്ടപ്പുറം മെത്രാനായി നിയമിക്കപ്പെട്ടത്. കഴിഞ്ഞ ഫിബ്രവരി 20 നാണ് വരാപ്പുഴ മെത്രാപ്പോലീത്തയായി നിശ്ചയിച്ചുകൊണ്ടുള്ള പ്രഖ്യാപനമുണ്ടായത്.

കല്ലറയ്ക്കല്‍ പിതാവിന് കോട്ടപ്പുറം രൂപതയുടെ ചുമതല

കൊച്ചി: കോട്ടപ്പുറം രൂപതയുടെ അഡ്മിനിസ്‌ട്രേറ്റര്‍ ചുമതല വരാപ്പുഴ ആര്‍ച്ച് ബിഷപ്പായി ചുമതലയേറ്റ ഡോ. ഫ്രാന്‍സിസ് കല്ലറയ്ക്കലിന് നല്‍കി. സ്ഥാനാരോഹണ ചടങ്ങിന്റെ സമാപനത്തില്‍ വത്തിക്കാന്‍ പ്രതിനിധി മോണ്‍. ഡോ. വിബുയ്ക്ക ഇതുസംബന്ധിച്ച പ്രഖ്യാപനം നടത്തി. 23 വര്‍ഷം കോട്ടപ്പുറം ബിഷപ്പായി സേവനംചെയ്ത ഫ്രാന്‍സിസ് കല്ലറയ്ക്കലിന് പകരക്കാരനെ ഉടന്‍ നിയമിക്കില്ലെന്ന സൂചനയാണ് സഭാകേന്ദ്രങ്ങള്‍ നല്‍കുന്നത്.

തിരുവനന്തപുരം: യൂണിറ്റിന് 25 പൈസ സര്‍ച്ചാര്‍ജും 300 യൂണിറ്റിനു മുകളിലുള്ള അധികവൈദ്യുതിക്ക് 7.25 രൂപ യൂണിറ്റ് വിലയും നിലവില്‍ വന്നതോടെ സംസ്ഥാനത്തെ ഗാര്‍ഹിക ഉപയോക്താക്കളുടെ വൈദ്യുതിനിരക്ക് എട്ടു മുതല്‍ 56 വരെ ശതമാനം വര്‍ധിച്ചു. സ്ലാബടിസ്ഥാനത്തിലുള്ള വൈദ്യുതിനിരക്ക് വര്‍ധിപ്പിക്കുമ്പോള്‍ ഉണ്ടാവുന്നതിനെക്കാള്‍ കനത്ത ആഘാതമാണ് ഇപ്പോള്‍ സര്‍ച്ചാര്‍ജിലൂടെ ഉണ്ടായിരിക്കുന്നത്. ഇത് സാധാരണക്കാരന്റെ കുടുംബ ബജറ്റിന്റെ താളം തെറ്റിക്കുമെന്നുറപ്പാണ്.

പല സ്ലാബുകളിലായാണ് സംസ്ഥാനത്തെ വൈദ്യുതി നിരക്ക് നിശ്ചയിച്ചിട്ടുള്ളത്. ഒന്നു മുതല്‍ 40 വരെ യൂണിറ്റിന് 1.15 രൂപയും 41 മുതല്‍ 80 വരെ യൂണിറ്റിന് 1.90 രൂപയും 81 മുതല്‍ 120 വരെ യൂണിറ്റിന് 2.40 രൂപയും 121 മുതല്‍ 150 വരെ യൂണിറ്റിന് 3.00 രൂപയും 151 മുതല്‍ 200 വരെ യൂണിറ്റിന് 3.65 രൂപയുമാണ് ഗാര്‍ഹിക ഉപയോക്താക്കളില്‍ നിന്ന് ഈടാക്കുന്നത്. 201 മുതല്‍ 300 വരെ യൂണിറ്റിന് 4.30 രൂപയും 301 മുതല്‍ 500 വരെ യൂണിറ്റിന് 5.30 രൂപയും 501 മുതല്‍ മുകളിലേക്ക് 5.45 രൂപയുമാണ് വില.

ഈ നിരക്കില്‍ നോക്കുമ്പോള്‍ പ്രതിമാസം 100 യൂണിറ്റ് ഉപയോഗിക്കുന്നയാളിന് രണ്ടു മാസത്തിലൊരിക്കല്‍ വരുന്ന ബില്‍ പ്രകാരം വൈദ്യുതിയുടെ വില മാത്രം 340 രൂപയാണ്. മാസം 200 യൂണിറ്റ് ഉപയോഗിക്കുന്നയാളിന് 981 രൂപയും 300 യൂണിറ്റ് ഉപയോഗിക്കുന്നയാളിന് 1841 രൂപയും വില നല്‍കണം. എന്നാല്‍ സര്‍ച്ചാര്‍ജ് വരുമ്പോള്‍ 100 യൂണിറ്റിന് 390 രൂപയും 200 യൂണിറ്റിന് 1081 രൂപയും 300 യൂണിറ്റിന് 1991 രൂപയുമായി വില വര്‍ധിക്കും. 300 യൂണിറ്റ് ഉപയോഗിക്കുന്നയാള്‍ക്കുണ്ടാവുന്ന വര്‍ധന എട്ടു ശതമാനമാണെങ്കില്‍ 200 യൂണിറ്റ് ഉപയോക്താവിന് 10 ശതമാനവും 100 യൂണിറ്റ് ഉപയോഗിക്കുന്നയാളിന് 15 ശതമാനവുമാണ് നിരക്കുവര്‍ധന. വൈദ്യുതിയുടെ വിലയ്ക്കുപുറമേ നല്‍കേണ്ട 10 ശതമാനം നികുതിയിലും ആനുപാതികമായ വര്‍ധനയുണ്ടാവും.

പ്രതിമാസം 300 യൂണിറ്റിലധികം വൈദ്യുതി ഉപയോഗിക്കുന്നവരെ കാത്തിരിക്കുന്നത് ഭീമമായ വര്‍ധനയാണ്. ആകെയുള്ള 76 ലക്ഷം ഗാര്‍ഹിക ഉപയോക്താക്കളില്‍ 300 യൂണിറ്റിലേറെ വൈദ്യുതി ഉപയോഗിക്കുന്നത് 65,000 പേരാണ്. 310 യൂണിറ്റ് വൈദ്യുതിക്ക് നിലവിലുള്ള താരിഫ് പ്രകാരമുള്ള വില 1947 രൂപയാണ്. എന്നാല്‍, 300 യൂണിറ്റ് വരെയുള്ള സര്‍ച്ചാര്‍ജും അധിക വൈദ്യുതിക്കുള്ള വിലയും കൂടി വരുമ്പോള്‍ ഇത് 2242 രൂപയാകും. നിരക്കുവര്‍ധന 16 ശതമാനമാണ്. 325 യൂണിറ്റിന്റെ വില 2106 രൂപയില്‍ നിന്ന് 25 ശതമാനം വര്‍ധനയുമായി 2618.50 രൂപയായും 350 യൂണിറ്റിന്റെ വില 2371 രൂപയില്‍ നിന്ന് 37 ശതമാനത്തിന്റെ വര്‍ധനയുമായി 3246 രൂപയായും മാറും. 400 യൂണിറ്റ് ഉപയോഗിക്കുന്നവരുടെ വിലയില്‍ 55 ശതമാനത്തിന്റെ വര്‍ധനയാണുണ്ടാവുക. നിലവിലുള്ള വിലയായ 2901 രൂപ ഒറ്റയടിക്ക് 4501 രൂപയിലെത്തും. ഇത്തരത്തില്‍ വൈദ്യുതിഉപയോഗം വര്‍ധിക്കുന്നതിനൊപ്പം നിരക്കുവര്‍ധനയുടെ തോതും ഉയരും.